Thenzawl Bazar Corps tlawh a ni

Hun rei tak atanga kan lo nghah Thenzawl Bazar Corps tlawh chu Pathian kaihhhruaina in kan lo ti puitling thei ta a, Pathian hnenah lawmthu kan sawi a ni.

Ni 11 September zing dar 10 ah RM Hall kawt atangin mi 37 te chu bus in kan chhuak a, Major Lalnunthari, DLOMS in Pathian hnena tawngtaiin min thlah.Pu C. Lalthlamuana, Asst. Leader chu kan zin chhung hian Commander a ni a, ani kaihhruaina ang hian thu awih takin kan awm thin.

Chhun dar 12:30 ah Hmuifang tlang kan thleng a, thingpui in pahin thlala in hun kan hmang. A hmunhma a nuam hle.Chawhnu dar 3 ah Thenzawl chu tluang takin Pathian kaihhruaina in kan thleng.

Thenzawl Bazar Corps SAY ten theitui leh chhhang nen min lo hmuak a, in hrang hrangah min thlen darh tira, chumi hnu ah Thenzawl khelmual ah Bazar Corps ve ve (TBC leh ABC) te chuan Football hlim takin kan khel a, Aizawl Bazar Corps SAY te si 5-4 in kan chak zawk a ni.

Zan dar 7 ah Tawngtai inkhawm neih a ni a, Nl.H. Lalhriatpuii, Treasurer in inkhawm a kaihruai a, Pu Robert VL Thlamuana’n Pathian thuchah a puang a, In hmelhriattirna hun Corps pahnih ten kan nei a, Kan Secretary ve ve ten hlim takin an kaihruai. Kan Corps atangin Band leh Zaipawl ten hun kan hmang. Thenzawl Bazar Corps CSM in min lawmna thu a sawi a.

Thianghlimna inkhawm ah Dr. K. Lalhruaitluanga Fin. Secy inklhawm hruaitu a ni a, Pu C. Lalthlamuana Asst. Leader in Pathian thuchah a puangchhuak. Kan Corps atangin Nl. Vanlaldiki Sailo zai te, Zaipawl te, Skit team te leh Band ten hun kan hmang. Inkhawm a nuam hle.

Chawhnu Fellowship ah Tv. Nelson Lalthanpuia Asst. Secy in inkhawm a kaihruai a, Tv. Lalhmingduhawma, Thenzawl Bazar Corps leh Nl. Vanlaldiki Sailo te an zai a, Aizawl Bazar Corps Band ten Pathian fakna hla an tum bawk.

Chawhnu dar 3:30 ah Thenzawl Field Veng ah Khawlai inkhawm kan hmang a, Nl.Judy Lalfakzuali, Evangelism i/c in a kaihruai a, Band te, skit leh Worship dance te bakah Nl. Vanlaldiki Sailo zai te chu mipui tam takin an rawn thlir a, thuchah tawi fel takin inkhawm hruaitu hian a sawi bawk.

Chhandamna inkhawm ah Pu Chawngsangliana, Corps Secretary Thenzawl Bazar Corps in inkhawm a kaihruai a, Pu Robert VL Thlamuana’n Pathian thuchah a puangchhuak a, Band, Zaipawl ten hun kan hmang a, Pathian thuchah puanchhuah zawh hian Pathian fak leh chawimawiin hun kan hmang a, Nl. Judy Lalfakzuali leh ABC Worship team ten kaihruaiin hlim takin Pathian awmpuina in hun kan hmang a, hetiang hun hi Thenzawl Bazar Corps a din tirh atanga vawi khat an tawn na a ni.Thenzawl Bazar Corps SAY te tanpui nan Rs.2000/- kan pe. Thenzawl Salvation Army hi kum 1977 April ni 26 ah Aizawl Bazar Corps te leh Pu Lalauva, Baktawng te tangdunin an din tan a ni.

Zan inkhawm ban dar 10 pelh ah Aizawl pan tum in kan chhuak a, Thenzawl dai ah leiminin min dang avangin kan let leh a, mipa ho chu Biakin ah kan riakkhawm a, hmeichhe ho Home League Secretary leh CSM te inah an riak a, Thawhtan zingah chaw kan ei a, leimin thenfai a nih hnu zing dar 10:30 ah Thenzawl chu kan chhuahsan a, hawn kawngah hian harsatna tawk lo in chhun dar 1 ah Hmuifang tlang kan thleng a, ei leh in a kan chawlh hnu a tluang taka tlan zelin tlailam dar 5 ah Biak in kawt (RM Hall kawt) kan rawn thleng.

Thenzawl Visit tum

Youth Congress lo awm leh tur thleng tu tur Thenzawl Bazar Corps SAY ten Bazar Corps SAY te tlawh tura min sawmna chu SAY Council chuan tihhlawhtlinsak ngei tha a ti a, kal hun atan ni 11.9.2010 (Inrinni) ni se tih a ni.

Thenzawl Bazar Corps hian Bazar Corps SAY te an beiseina hi a rei tawh hle a, amaherawhchu hun remchang a awm mai thei lova, anmahni lam pawh an inbuatsaihna a nasa in Local channel velah pawh he visit programme inkhawm zawng zawng hi Live a tihchhuah an tum nghe nghe a ni. Hemi tur atan hian SAY member atam thei ang ber kal turin inbuatsaih ang.

A bik takin Band, Skit leh Worship Dance a tel thin te phei chu kal ngei ngei tur a ni. Inrinni ah intihhlimna leh Sports neih ho tur a ni a, Pathianni ah inkhawmna leh Fellowship a hun hman ho tura Programme ruahman a ni.

Bus Hire a kal tur a ni dawn a, member zawng zawng kal i tum theuh ang u. Kal dan tur leh a hun (dar) chu chiang zawkin la inhriattir leh a ni ang.

Family Sunday

Kar hmasa Ni 29.9.2010 Pathianni kha India Eastern Territory pumpuiah Family Sundaya hman a ni a, Bazar Corps ah pawh urhsun taka hman a niin inkhawm pawh an thahnem hle. Inkhawm hi Major Rochhungi CO in kaihruaiin Band in Pathian fakna hlamawi tak an rem a, Major Vanlalhuma CO in Pathian thuchah ropui tak, bengvarthlak tak leh sipaite tana tangkai, hman nghal mai theih a sawi bawk.
Family Sunday ah hian chhungkua a inkhawm kim te hnenah lawmman atan Sana lian banga tar chi pek an ni a, Corps lian vaklo tiat zet - chhungkaw 36 lai mai inkhawm kimin, lawmman leisa pawhin a daihlo hial a ni.

SAY Financial Report For The Month Of August, 2010

INCOME

1. Collection - 3389.00
2. Faith Promise - 16480.00
3. Missionary - 2450.00
4. Special Fund - 490.00
5. Literature - 1860.00
6. Music - 4500.00
7. Contingencies - 30220.00
TOTAL - 59389.00

EXPENDITURE - 21943.00

Worship Dance Competition Neih a Ni

by- Vanlaldiki Sailo, Drama i/c

Action Plana awm angin ni 30 August, 2010 (Thawntan) zan khan Bazar Corps SAY te chuan Brigade Worship Dance Competition kan nei a. Hemi zan hian hun hlimawm tak kan hmang a, inkhawm pawh kan thahnem in nu leh pa lam pawh in min tawiawm tha hle a ni.

He inkhawm hi Tv.Lalsangbera Asst. Drama i/c in a kaihruai a. Nl Ellen Lalengzuali Secy in thu puanna a nei a. Hemi zawh hian Pu C.Lalthlamuana Asst.Leader, hemi zana kan host in hun a rawn hmang zui a. Hneh takin Competition a rawn kaihruai a. Intihsiakna tan nghal a ni. English hla a intihsiakna neih hmasak a ni a. Major Lalthansanga Brigade ten bul rawn tanin Major Sangzuala Brigade ten an dawta, Major PC Thansanga Brigade in hnung an rawn dawl a. Sap hla bika Intihsiakna a zawh hnu hian Nl.Lalrindiki’n zaiin min awi a. Mizo hla a intihsiakna neih chhunzawm leh nghal a ni.

Mizo hla ah hi chuan Major PC Thansanga Brigade ten bul an rawn tan ve thunga, Major Sangzuala Brigade in an dawta a hnuhnung berah Major Lalthansanga Brigade an rawn lam ve thung a ni.

Intihsiakna neih zawh hnu hian Bazar Corps Beat group ten zai mawi takin min awi a, mipui lam thawm pawh a tha hle.

Judge pali ten uluk taka an endik a, point an pek hnu in result puanna neih a ni a. A hnuai kan han tarlan te hi Brigade te lawmman lak dan a ni.

Mizo
1st - Maj Lalthansanga Brigade
2nd - Maj P.C.Thansanga Brigade
3rd - Maj Sangzuala Brigade

English
1st - Maj P.C.Thansanga Brigade
2nd - Maj Sangzuala Brigade
3rd - Maj Lalthansanga Brigade.

Best Dancer (Female)
Marina Lalrintluangi (Maj.P.C.Thansanga Brigade)

Best Dancer (Male)
Erick Vanlalngaihsaka (Maj.Sangzuala Brigade)

Most Promising Dancer
Lalruatdiki (Maj Lalthansanga Brigade)

Tin, overall a champion chu Maj. P.C.Thansanga Brigade te an ni.Anni hian Rs.1500/- bakah Trophy mawi tak an la a, Lawmman pahnihna dawngtu Maj. Lalthansanga Brigade ten Rs.1000/- leh trophy an la bawk. Maj.Sangzuala Brigade ten lawmman pathumna la in, anni hian Rs.500/- leh Trophy an la bawk.Tin, Mimal lawmman dawngte pawhin Trophy mawi tak an dawng theuh a ni. Result puan zawh a ni hnu hian kan vai in ‘Zion Khawpui’ tih hla - Mizo hlathluk diktak mai mizo te lungkuai zawng tak mai hmangin Pathian faka lam hona ropui tak kan nei a, Vanlalhuma C.O. in tawngtaina in Worship Dance Competition chu kharna a nei ta a ni. Inkhawm ban hian Biakin chung zawlah thingpui tui tak inhona kan nei a, Worship Dance Competition chu khamlo takin kan tin ta a ni.

Kan sawi hmaih hauh loh tur chu he Competition hi huphurh tak chunga buatsaih a nih laiin kan beisei phak aia nasa in Pathianin hna a thawka, thalaite ah inlungrualna leh inpawhna thuk zawk a rawn thlena, tin, nidanga lam ngai lemlo talent nei tha tak tak haichhuahnan hman a ni bawk a, kan hlawkpui takzet a ni. LALPA CHU FAKIN AWM RAWH SE!!