Wednesday, March 9, 2011

CHHOTA GONGRAI & SIMALUNG BIAK IN SAK REPORT

By Maj. Vanlalhuma CO

Bazar C.O bial hruaitute hma lakna in Pu Chawnghlira Col. Sgt. Chanmari Corps leh Pu H. Lalbiaka QM, Chanmari ‘W’ Corps te nen ni 14.2.11 khan Biak in sa turin Tripura kan pan a, Behliangchhip atangin Capt. Rohlupuia, CO leh mistiri 2 in min zui bawk. Ni 15.2.11 zan dar 8:00 velah Chhotagongrai chu thlengin ni 16.2.11 ah Biak in sak chu tan a ni a, zing hma tak atangin tlai lam a thawh theih chhung chu thawh a ni.

Biak in hi 15’x30’ a zau niin ni 2 chhungin sak zawh ani. Ni 18.2.11 ah Simalung ah Biak in (Bazar Corps Missionary te sak a ni) dang sak leh a ni a, hetah hian thingzai duh ang lei tur a awm loh avangin thingtuai leh thing hem phel te lak chawp a ni a, a hautak hle mai. Mahse Lalpan min pui a, ni 2 chhung bawkin 12’x24’chu sak zawh a ni leh ta. Lalpa chu fakin awm rawh se. Ni 4 chhungin Biak in 2 (pahnih) sak zawh a ni a, Biak in hi a chung leh a bang rangva vek niin an khuaa in tha ber ve ve a tling. Simalungah phei chuan Pathian Biak in an neih vawikhatna a ni a, a lawmawm leh sual hle.

A MI CHENGTE: Khawvel hmasawnna hian ala thleng ve rih lo. In leh lo, silh leh fen, ei leh barah an la hniamin an khawsak a harsa hle mai a, thlengah chaw an la ei lova, changel hnahah vek kan ei. Ek in an neilo a, bawlhhlawh paihna bik pawh a awm lem lo. Tui an hmang tlem em em a, tin 1 dawng chhunkhawlna nei an vang viau ang. Inbual dawn paw’n luiah kal a ngai. Mualthuam (Molsom) hnam an ni a, mizo hnahthlak ni awm tak an ni. Kan tawng pawh in ang a tam mai, mahse Bru (Tuikuk) lam an la pawl tam mah a, Tuikuk tawng pawh an thiam tlangpui. Thuamhnaw leh mutbu an neilo a, zingah hma takin an tho a, mei an chhem hluah a an ai thin. Hei hi zing lam khawvawtah an mut theih thin loh vang niin an sawi.

MIN NGAIH DAN: Mizote min ngaisang hle a, min zah tlat a, hna thawhho pawh a harsat phah a tirh dawt loh chuan min en mai thin. Thil engkim nei leh titheiah min ngai ni berin ka hria, rambuai hma lam daiha SAP kan ngaisang ang chiah khan min ngaisang a, an duh duh min dil mai a ni. Biak In ah-Khuang, Guiter, Bible, Flag, Thutthleng (Plastic chair telin) te an nei lo a,thuamhnaw, mutbu, bungbel an mamawh tak zet a ni.
Biak in tharah hian pawlah mi 4(pali) lawm lutin nau 2(pahnih) hlan a ni a, naute hi tuamna puan an neilo nge ni ruakin min rawn pe tawp a, kan hlan tawp mai a ni. Inkhawm boruak a tha em em a, an zai uarin an phur a, an hla kan thiam lo erawh chuan min tibuai deuh. MITDEL, hlim em em a ban phar a, Pathian fak hmuh chuan min hneh tlang hle a ni.
Kan haw dawn chuan naupai pumna damlo kan zuk kan a, lei chhuata mu in, a pasal in a mal alo lukham tir a, a bulah chuan a pa, midel hlim tak a lam kha lei lawngah gamchha tet tawh sinin alo mu bawk a. Tawngtaina ka hmanga a ziaawm thu min hrilh a. Pu Biaka, QM nen kan mutbu kente chuan chhuat lawnga mu mitdel chu kan zuk khuh a. Haw tura kan chhuak chu an monu chuan kawngka biang ngheng hian min rawn thlir reng a, “I dam tawh em ni?” ka zuk ti a, ani chuan ‘aw’ tiin mittui tla ngiai ngiai chung hian min bye bye a, kalsan a har ngei mai. Isua hunlai a damloten Isua an mamawh zia te min hriatchhuah tir vang vang a, min thakhlelhna a nasa a, kan haw chu min rawn thlah dum dum a,
motor thlen theih chin Saimarua thleng tur chuan ke in darkar khat vel kal a ngai a, chumi thleng chu min thlah a, mittui nen kan in mangtha ta a ni.
Heng mite hian i neih chuangliam i mamawh tawh loh te kha an mamawh em em a, chanchintha rawngbawl nan i hlan ve thei ang em le?

Vawiinah hian Lalpa tana lawm taka pe phal tunge awm le?

Tuesday, March 1, 2011

Leadership Training Khawruhlian Corps-ah

by Leader, SAY


February ni 19 ,2011 khan Central North Division SAY OB te Khawruhlian Corps ah Leadership Training neih a ni. Division chhunga North zone & khawpui chhung Bial 15 atangin mi 137 lkan ni a, Bazar Corps atangin OB pathum kan kal. Leadership Training-ah hian lokal fo tawh mah ila hlawk taka hman hi a harsa thin khawp mai a, tun tum ah erawh chuan hmasawnna hmuh tur leh chhar tur a awm nual mai.

INBUATSAIHNA : Kan zavaia kan hriat leh tha kan tih theuh, mahse kan tih loh fo thin chu INBUATSAIHNA a ni. Mahse, training Resource person-te atanga langchiang em em mai chu ‘Inbuatsaihna tha hi programme hlawhtlinna a ni’ tih hi. An zavaiin mahni hnathawhnaa buai tak vek an ni chungin ah tih turah an chiang a, an hun hman leh thusawi atangin a hmuh theih, thil tullo leh ngaihtuahna a awm chawp sawi a awmlo. Chhuanlam engemaw siama inbuatsaihna hun neih loh thu sawi tumah an awm lo hi a entawn tlak ka ti khawp mai.

ARRANGEMENT: Mitin ten kan mamawh chu hmasawnna a ni. Hmasawn tur chuan thawh hona tha kan mamawh angin a huho in zirtirna kan dawng a, mimal tinte pawimawhna kan inhriat tawn sak theuh thei a ni.

HRUAITU CHU TUNGE:
Pawl/kohhran-ah thuneihna pumhmawm ching ten inlungrualna an tichhe thin a, midangte ngaichang thin, midangte hriatthiamna leh Pa chan changa hruaitu hruaina hnuaiah chuan inlungrualna awm thin, chutiang hruaitu chu kohhran hian a mamawh ani. Mi thuhnuaia kun thiam leh thuawih theite hi mi tam tak chunga hruaitu la ni turte an ni.

Rinna kawnga puitling, zirtirna danglam leng vel karah pawh nghet taka ding thin mi, taksa leh rilru tichhe thei laka insum thin te hi hruaitu tlingte chu an ni. Hruaitu tha chuan amah a inngaih pawimawh ang bawkin a kova innghat rawngbawlna hna chu a ngai pawimawh tur a ni.

COUNCIL HLAWHTLINNA: Hruaitu chuan council naah member tu emaw thu lak bik neiin thu tlukna a siam tur a nilo va, tin, Council Member-te pawhin thurel leh thutlukna chungchangah midang hnena sawichhâwn awm chin a thliar fel thiam tur a ni. Council-naa mahni ngaih pawimawh zawng sawi vak hi mi puitlinglo zia ani.

THAWHHONA THA: Kohhrana thawhhona tha min neih tir theilotu chu Mahni thu duhna, Chapona, Mahni hmasialna leh Intihbikna hi a ni. Chutih lain Inhriatthiam tawnna, chaklohna in hriatpuia indawm tawn leh neitu rilru pu chunga kan kova tla apiang rawngbawlna ani tih hria a, phunnawi lova thawh mai hian thawhhona tha a siam thin.

KHAIKHAWMNA: Thinrimna hi atthlak takin a intan a, inchhirna in a tawp thin. Thudik chau sawi ila tichuan thuhnu dawna buaina kan pumpelh thei dawn a ni. A tawp berah chuan beih dan ngai renga bei chung si a, rahtha zawk beisei tlat hi mawlna chikhat a ni. Hmana kan tihdan ti lova, khawvel changkan ang zela in siamrem hi hruaitu chuan a thiam tur a ni.