CAREER GUIDANCE PUALA INKHAWM NEIH A NI

Ni 19th Jan.09 : Thawhtan zan SAY inkhawm chu Career Guidance anga hman a ni. Steve Lalthantluanga’n inkhawm a kaihruai a, John L.T. Sanga hnen atangin ‘Career Guide’  lam hawi zawng thuchah ngaihthlak a ni.

Hemi zan hian SAY member, Class-X pass chin atanga Master Degree nei tawhte tana hnathawh awm chi leh tha eizawnna ngialnghet neih theihna tur, inhriattirna leh inkawhhmuhna te neih a ni.. Hun changtu Tv. Johna’n thalaite tana hnathawh awm chi, chi hrang hrang dil dan leh dil thei chinte bithliahna fel taka siamsa chu inkhawm zawng zawngte  a sem vek a, chuta tanga zawhna awmte chhangin, SAY member te nen Career siamna atana pawimawhte sawihona hun tha tak neih  a ni.

SAY member, hnathawk tawhte atangin Indian Army a luhdan te, Police lama luh dan te, sumdawnna kawng hrang hrang leh sorkar hna lama luhdan leh inbuatsaih dan tur te ngaihthlak a ni bawk a, thalaite chu awm mai mai lo tur leh kan phak ang tawk zela hnathawk tur kan nih zia leh kan zirna, eizawnna kawng engkim hi Pathian tih leh ring chunga kan tih chuan hlawhtlinna kan hmu thei a ni tih thu kan ngaithla.

   Pathian tih hi finna bul a ni a, khawvel thiamna lamah chhuan tur kan nei lo anih pawn Amah kan tih a, A thu kan zawm a, a malsawm tlak a kan nun phawt chuan eizawnna a ni emaw, zirna lamah a ni emaw, kohhran a kan rawngbawlna kawng thlengin kan hmuingil anga, harsa lutuk leh mite hmuhsitin kan awm ngai dawn lo a ni tih thu kan ngaihthlak chu SAY member-ten tha kan ti a, kan hlawkpui bakah zawngchhang tlak kan ti hle a ni.

    Hemi zana thu kan ngaihthlak leh member-ten an tawnhriat hrang hrang an sawi atang khan zirlai nih lai leh kan thatlai hun ah hian Kohhran/Thalai  rawngbawlna hrang hrang leh thiltih na a tel hi fail leh hlawhchham phahna a ni ber lo tih kan hria a, phak ang tawk a in hmang ve hram hram thin te chuan Pathian malsawmna dawngin an zirlai ah leh an eizawnna lamah hlawhtlinna an hmu thin tih kan hria a, Kohhran/Thalai a inhman hi kan zirlai leh eizawnna lama  min tibuaitu nilovin malsawmna min thlentu an ni zawk a ni tih chiang takin kan hria. ‘A ram leh a felna chu zawng hmasa la chutichuan i thinlung duhzawngte chu a pek belhchhah ang che ’.