S.A.Y NATURE WATCH

Thalai ten ruahmanna kan lo siam tawh bawhzui nan Nature Watch chu May Ni 30 khan Tanhril, Sports & Youth Services Centre ah neih a ni. Items chi hrang hrang, Mapping, Bible Study, Awareness on Deforestation & Forestation, Ram hmul damdawi inhriatsiak, Thing hming leh a thatna inhriatsiak leh On the Spot Poetry Writing Competition neiin hun hlimawm tak hman a ni.

Mapping: Ramrikawn atanga Centre hi ke a kal tur anih avangin, hemi ni hian member panga kal hmasain Tanhril khawdai atangin Brigade flag phun chhoh a ni a. Flag phun na ah hian Brigade tin tan hian tih tur phum ruk vek a ni a. A hahthlak bakah a hlimawm hle bawk a ni.

Bible Study: Bible Study hi Nl. Ellen Lalengzuali, SAY Secretary in min kaihruai a, Genesis 1:28, 2:15 leh Rom 8:18 atangin zirho na kan nei a. Paper-te a rawn buatsaih bawk. Thingkung hlim hnuaia Bible study kan neih te kha a lo nuam danglam hle mai, kan chhehvel thing leh mau leh thereng te pawhin an lo ngaithla ve tlat te hian a hriat a ni.

Awareness on Deforestation & Forestation: He hun hi Pu. Robert V.L Thlamuana SAY Leader in a kaihruai a. Mihring te hian Ram kan tih chereu nasat avanga keimahni leh keimahni harsatna kan in siam dan te, Pathian in heng a thil siamte enkawl tura ruat kan nihna hre lo a, a ti chereutu kan nih hian Pathian duh loh zawng tak kan nih theih thu te ngaihthlak a ni a. Thing leh mau kan tih chereu avanga Boruak chhia lo pian chhuah dan te, kan lo neih dan tha lo (Shifting cultivation) leh ramsa chunga kan ngilneih loh zia te a sawi lang bawk a. Kan pi leh pute tih dan thalo chu paih a, keini thalaite hian bul kan tan that chuan kan ram hi ram nuam takah kan siam leh thei a ni tiin thalai te min cho a. Thutiam lakna hun a hawng nghal bawk. Kan tiamte:-
1. Ram ngaw humhalh turin.
2. Thingphun turin.
3. Ram ti chereu lo turin.

Heng thutiamte hi thalai ten kan la urhsun hle a, thalai 25-ten rilru leh tihtak zetin, ‘ Aw kei hian kan Ram, chhan tlaka la awm hi ka la humhalh thei a ni’ tiin hming an sign hnan a ni.
Ram hmul damdawi inhriatsiak: Brigade in elna anih avangin, kan tang tlang hle a. Rin aiin Ram hmul lakkhawm tur lah kan hre tlang. Hnah 5 lak turah 10 aia tam rawn la te an awm a. A bengvarthlakin a hlimawm hle mai. Min endiksaktu Dr.K. Lalhruaitluanga, Asst Secretary pawh a bengvar letling ngawt ang!

Thinghming leh a thatna inhriatsiak: Brigade in elna bawk a ni a, Thingkung 5 hming leh thatna ah inel a ni. Ramhnuaiah kan chhuak sang sang a, a thente phei chu kan kiu ruih ruih a, a nuam khawp mai. Minute 5 pek kan ni a, hetah hian Pu. C. Lalthlamuana, Fin. Secretary-in min endik sak a, kan lo hre tlang hle mai. Tin, sava ten an tlan thin thingrah nei te pawh kan hriat belh mai bakah kan humhalh a tul zia te kan in hrilh hria a ni.

Poetry writing competition: ‘Min hual veltu Ramngaw leh Ramsa humhalhna’ na lam hawizawng a inziahsiak a ni. Literature i/c Tv. Victor M.S Dawngliana’n min kaihruai a, Thalai ten thu ziak pawh kan lo thiamin kan lo ril tlang hle mai.

Chawte kan han ei kham a, reilo te kan han chawl hahdam a, Tv. Nelson Lalthanpuia, Evangelism Incharge in tawngtaina in kan hun min khar sak a, tichuan ke bawk a Ramrikawn thleng kalin, tluang takin in lam kan pan ta a ni.