League of Mercy Rally Report

Rozuali, Secretary, LOM

Kan ngahhhlelh em em League of Mercy Rally chu tluang tak leh dam takin kan lo hmang zo leh ta reng mai. Pathian min hruaina te a ropui tak zet a ni.

Dt.29.10.2010(Friday) 12:30pm ah Aizawl atangin Sawleng panin kan chhuaka, kan chhuah dawnin CO

Maj. Rochhungi’n tawngtaina te a nei a, tluang taka kalin Sawleng chu tlai dar 5:30 ah kan thleng a, motor rui thinte pawh tumah rui an awmlo a ni. Hemi zan hi palai lawm zante a ni a, palai zawng zawng hi 250 vel kan ni a, Bazar Corps atang pawhin member 9 kan kal. Hemi zan hian activities report na neih ani a, Corps hrang hrang atangin report ngaihnawm leh benglut tak tak ngaihthlak a ni.

Dt.30.10.2010(Saturday) chawhma sermon inkhawm a ni a, chawhnu lamah Pu Chalchhuna te thlanah (Holy Land) kan kal a, hetah hian Maj. Lallawmpuii, DSWM in kaihruaiin tawngtairualna te kan nei a ni. Zanriah tui tak thlengtu Corps ten min buatsaih saka kan puar hle. Zanah sermon inkhawm neih leh ani a, item hrang hrang neih leh ani a, inkhawm apiang hian Division Songster ten thiam takin zaiin min awi reng a, anni hian minti phuisui hle.

Ni 31.10.2010(Sunday) zing kar hian mi harsa zual 5(panga) kan tlawh a, Rs.500/- theuhin tanpuina pek anni a, an mahni hmuh hian rilru a khawih duh khawp mai. Midangte tanpui theitu zawka kan tang hi ava lawmawm em. Mittui tla zawih zawih chunga tanpuina an dawng han hmuh chuan LOM lo hlut zia a lang a ni! Tawngtaina te kan nei zel bawk a. Tanpuingaite tanpui duhna thinlung nei LOM member nih hi alo hlu hle mai. Kan Lal Isua pawh khan ‘Heng mite berte zinga mi pakhat chunga in tih chu ka chunga ti in ni’ a tih kha i hrereng ang u.

Chawhnu Sermon inkhawm kan nei leh a, boruak a nuamin a tha khawp mai a Bazar Corps atang pawhin Pi J. Lalrinmawii’n recitation thiam tak maiin a sawi a, ngaithlatu te thinlung pawh a hneh hle a ni.. Inkhawm banah chhangban ruaite min buatsaih sak leh a a tui khawp mai.

Thlengtu Corps te in pekna ropui in palai kalte pawh in nuam kan ti hle a, mikhual chunga an awmdan a entawn tlak hle, mikhual thenkhat phei chu a neitu te aia thu zawk pawh kan awm a ni.

Chhandamna Inkhawm hi final meeting alo ni tawh a, hetah hian DDWM in thusawina a nei a, thu benglut tak mai kan ngaithla a, boriuak pawh a thain zai pawh a nuamin a tha hle. Maj Sangchhunga, DC in hun tawp siamin inhlanna hunte a buatsaiha, inkhawm zawng zawngin inhlanna kan nei a ni.

LOM Rally hi a hlawhtling hle mai a, inkhawm boruak a tha a, kham lo takin kan Rally chu kan hmang zo a ni. Hlim tak maia Rally kan hmang thei hi corps sipaite tawngtaina rah a ni tih a chiang hle. Member, Rally-a kal theilo te pawhin thahnem ngai taka kan thawhrah avanga Rally hi hlawhtling a ni a, tawngtaina nen rawng i bawl zel ang u.