CORPS IN RETREAT NEI

Corps in alo rel tawh angin ni 26.1.2011 (nilaini) khan Tawngtaina tlangah Corps a rawngbawltu leh sipai a thei apiangte chuan thlarau lama intuaitharna neiin hun hlimawm tak an hmang. He hunah hian sipai 65 te chu Bus 2, Motor-te 8 leh two wheeler 3 hmangin an kal a, speaker atan Maj. Vanlalthanga hman a ni.

Chawhma lamin ‘Beram bo’ hmangin sermon ngaihthlak ani a; Corps a rawngbawltu kan nih lai hian kan rawngbawlsak sipaite hian midang aw ni lovin kan aw hriat an chak a, kan tawngtai sak an mamawh ani. Corps-a rawngbawltu te hi mipuite Lal kan ni lova, an rawngbawlsaktu tur kan ni. Hruaitu tha chuan mitha a chherchhuak thin a, lansarh tumna hi tisa lam tuihalna ani. Mahni hmasialna avangin corps a sipaite hi kan in ei tawn thei thin lo va, Rawngbawlna min siamsaktu Corps hi kan hmangaih tur a ni. Kan beram te hi kan veng ngun tur a ni a, Financial campaign te pawh hi Biak In ah ni loin sipaite ina kalin kan nei tur ani tih thute hmangin thusawi nung leh min cho tak ngaihthlak a ni.

Chawhnu lamah chuan Rawngbawlna chungchang thu ngaihthlak leh a ni a,
2Kor 3:6 thu hmangin inpumpekna atangin thlarau lam hruaitu nih theih anih dan te, Corps a mi tha tak tak, mahse langsar silo te talent haichhuah sak a tul thu te, sipaite in ngaihsak tawn a tul zia thu te ngaihthlak leh ani.

Sermon ngaihthlak zawh hnu hian mimal tinin thlarau-a chakna thar kan neih theihna tur leh thlarau pawlna thar changa hlawk zawka hun kan hman theihna turin Bethel na hun siam a ni. Speaker in Bethel-a Pathian kan dawrna tur atan kaihhruaina min siam sak a, sipaite thlarau lam hruaitu nihna kawnga rawngbawltu te kan in enfiahna turin hetiang hian tawngtaina hun hman a ni -

i) Ngun taka ka in enin thlarau lam hruaitu ka niin ka inhria em?

ii) Tuna ka enkawl / thawhpui te hian thlarau lam hruaitu niin min ngai em?

iii) Thlarau lam hruaitu ni tura ka chaklohna

iv) Thlarau lam hruaitu ni tura ka mamawh/tuihalna

v) Hun kal tawh leh tuna thlarau lam hruaitu ka nih theih lohna, tihte hmangin Pathian pawlna (Bethel) neih a ni.

Bethel zawh hian Biak In ah lut khawm leh in hun reilo te hman leh a ni a, chumi hnu ah pawn chhuakin kan ding kuala, mahni dinglam theuh a mite chu an luchungah kut nghatin malsawm sakna neih ani a, vawikhatmah malsawmna kan la hlan ngai lohte an luchunga kut nghata malsawm sak chu a ropui tak zet a ni. Tichuan tlai dar 4:00 pelh hretah Tawngtai tlang chu kan chhuahsam ta a ni.

He hun hlawhtling taka kan hman theihna tur atana mahni lirthei rawn kengtu zawng zawngte, Sound leh music thatak kan neih theihna atana theihtawp chhuahtu thalaite leh sipai, he hun ngai pawimawh a mahni hna tul leh pawimawh kalsana rawn kal zawng zawngte chungah lawmthu kan sawi tak meuh meuh a ni.

Lalpa’n malsawm che u rawh se.