Monday, October 8, 2012

Corps News update


As on 6 October, 2012

RALLY CHUNGCHANG...

# SAY Rally na a  kalturte chuan thosi len ken ngei ngei tur a ni a, mutbu hi Ni 11.10.2012 (Ningani) zanah RM Hall ah dahkhawm vek tur a ni.

# Zirtawp zing dar 6 ah RM Hall kawt atanga chhuah tur a ni a, kal tlai te chu tlansan an ni  ang.

# SAY member kal tur te chuan kalkawnga chaw eina tur mahni intum theuh tur a ni ang.

# Pu R.Thankunga (Thantea) te chhungkua in min lo thleng dawn a ni.

# Teirei Forest a kan SAY member Evangelist Teacher Candidate Vanlalringa leh Candidate Lalmalsawmi te leh an thiante pathum chuan Dapchhuah ah min lo nghak dawn.

# SAY member ten chawhmeh-dal, alu etc. ken ni se, thlenin te tihautak lo a kan awm theih nan. Hemi bakah mahni hman mamawh tur - toiletries(toothpaste, sabon etc.) intodelh vek ni se.

# Tuidam a mi harsa tanpui ngaite tanpui na turin Ni 08.10.2012 (Thawhtanni) zan SAY inkhawmah hian Bawm hun a ni dawn a, SAY ten kan theih anga tam Pawisa thlak theuh kan tum dawn nia.

# Rally-a kalna tur Rs. 15,000/- Senior Corps in min tumsak avangin kan lawm hle bawk.

# Rally na ah hian zinkawngah leh a hmunah pawh Convener turin Pu C. Lalthlamuana leh Pu Peter Lalthasiama te ruat an ni a, thuawihlo leh tihmawh awm lo tur in kan awm theuh dawn nia. Anni kaihhruaina hnuaiah hian kallam leh haw hun thlengin kan awm dawn a, bus chuan chungchangah te, tin, thlenna hmunah pawh an kaihhruaina hnuaiah kan awm reng dawn a, tumah an thu hnial zawng leh thuawihlo zawnga awm loh tur a ni.

# Zirtawp zan Welcome Meeting a zai hruai turin Tv.Lallawmzuala, Tv. Lalthansanga, Tv. Philip VL Rinpuia, Tv. Freddy Lalramnghaka, Tv. Oliver Zothanpuia, Tv. Eric VL Ngaihsaka leh Candidate Vanlaldiki Sailo te ruat an ni.

# Tuidam a ken tur gas lo ngaihtuah turin Nl. Judy Lalfakzuali leh Nl. H. Lalhriatpuii te ruat an ni a, anni hian hma lo la in gas ken tur bur hnih a awm thei dawn a, an chungah SAY chuan lawmthu an sawi a ni.

# Bazar Corps Band ten Ni 13.10.2012 (Inrinni) Chawhma inkhawm ah item an nei ang a, Bial zaipawlpui (Halleluiah Chorus) chu Ni 14.10.2012 Thianghlimna inkhawm ah an neih a ni ang. Tin, kan Corps in Creative Arts Tawngtai inkhawm zan ah kan entir bawk ang.


Lawmthu sawi

Kan Corps atanga Teirei Forest a Evangelist Teacher a chhuak Candidate F.Vanlalringa leh Candidate Lalmalsawmi te nupa in kan Corps a Sipai te min ngenna anga Toys leh naupang lawm chi hrang hrang petu te zawng zawng chungah Bazar Corps SAY te leh Y.P Corps te chuan lawmthu an sawi a ni.


Lawmpui

Kan SAY Member Tv. Jesse Lalrinchhana s/o Maj. R.Lalbiakliana chuan NIELIT atangin BCA 1st Division ah a pass a, hetiang ang member kan nei hi kan chhuang in kan lawmpui hle a, a kal lehzelna turah duhsakna sang ber kan hlan bawk a ni.

Tin, kan SAY member Tv. P.C V.L Remtluanga chuan Taekwondo North East Zone Championship 2012 ah kg 85 chung lamah Silver Medal a la a, National Championship ah North East ai a awh nghal bawk ang. Hetiang ang member kan nei hi kan chhuang hle a, a kal lehzel na turah duhsakna kan hlan a ni.


Hriattur Pawimawh

Karleh Ni 12.10.2012 (Zirtawpni) atanga tan tur SAY Rally a kan Corps SAY atanga kal tum zawng zawng te chu Ni 08.10.2012 (Thawhtanni) zan SAY Inkhawmah kim taka inkhawm tur a ni a, hemi zanah hian khawmpui kal tum zawng zawng ten hming pek luh vek tur a ni. SAY Inkhawm zana kal hmanlo tur kan awm anih chuan SAY hruaitute hrilh tura ngen leh hriattir kan ni.


Zirna Hmun Lam Pan

Kan SAY Member Nl. Janice Lalchungnungi d/o Pu Lalsawmliana Rokhum, Dinthar-I chuan Ni 01.010.2012 (Thawhtanni) khan a zirna chhunzawm turin Delhi lam a pan a, tluang taka a zirna a chhunzawm theihnan leh hlawhtlinna tha tak a neih theih nan SAY chuan duhsakna kan hlan a ni.


Prayer Ministry

Prayer Ministry Inkhawm kar leh Ningani (Thursday) Ni 11.10.2012 zan dar 7:00 ah R.M Hall ah neih leh tur a ni a. Hruaitu atan Pi Tlangthangpuii, YPT a ni ang. Hetah hian a thei apiang kal tur a sawm kan ni a, a thei thei in chaw nghei tur a ni bawk a ni.


Gospel Camping

Kan Corps in hun rei tak ata kan lo beisei leh kan tawngtainaah te pawh kan lo dil thin Gospel Camping chu November ni 1-3, 2012 chhung hian neih tur a ni a, speaker atan Crussade hlawhtling taka min lo neihpui tawh tu Evan. Lalthanzama Hrahsel, TEM Speaker a ni ang. He camping lo awm tur atan hian Sipai tin ten thahnem ngai takin kan tawngtainaah i hria ang u.


SAY RISING DAY VAWI 58-NA

Territorial Headquarters in a lo pawmpui tawh angin October ni 8,2012 Thawhtanni hi SAY dincham 58-na a lo ni ta reng mai. Kum 1954 October ni 8 khan Saitual ah Inkhawmpui neih a ni a, Saitual khaw pawn atangin palai hming inziaklut mi 500 lai an ni a, khawtual inkhawm te nen chuan 1000 chuang an ni a, an hlim hle a, he inkhawmpui neih ni hi hun lo kal zelah Thalai rawngbawlna SAY lo intan hunah ngaih ni in Rising day ah puan a lo ni ta.

Tunah hian India Eastern Territory ah hian Division parukah SAY member a inpe mi Sing chuang teh meuhin rawngbawlna an kalpui mek a ni.

Salvation Army, IET ah hian hetiang hian hming hran hran vuahin Thalai rawngbawlna kalpui a ni tawh thin.
1. 1954-1971 chhung- Thalaite
2. 1971-1981- Torchbearer Group Movement
3. 1981-1995- The Young Crusaders
4. 1996-vaiin thleng - Salvation Army Youth



As on 29 September, 2012


Crusade Hlawhtling


Ni 22.09.2012 (Inrinni) zan Tawngtai Inkhawm atang khan SAY hmalakna in Retreat chhunzawmna atan Crusade neih a ni a, hun hlimawm tak leh hlawkthlak tak mai Ni 24.09.2012 (Thawhtanni) zan SAY Inkhawm thleng khan hman a ni. He crusade ah hian Speaker atan Pu Lalthanzama Hrahsel, TEM Speaker hman niin Pathian Thlarau Thianghlim awmpuina nasa takin SAY Member te leh he crusade chhimtu Corps chhunga Sipai te chuan an chang a ni.


Human Trafficking

Ni 30.09.2012 (Pathianni) hi ‘A day of prayer for victims of Human Trafficking’ pual a hman a ni a, Thupui hrang hrang hmangin tawngtaina neih tur a ni dawn a, Pathianni zan Chhandamna Inkhawm thlengin he ni pual hi hman a ni.



Toys la thehluh theih

Kan Corps atanga Teirei Forest a Evangelist Teacher a chhuak Candidate F.Vanlalringa leh Candidate Lalmalsawmi te nupa in kan Corps a Sipai te min ngen angin an awmna hmun a naupang te inawmtleina tur Toys (Naupang lawm) chu lakkhawm mek zel a ni a, naktuk Pathianni ah pawh hian a duh tan la kenkhawm theih a ni a, thehluh tur nei kan la awm anih chuan YP Hall ah dah tur a ni.



As on 22 September, 2012

Retreat Nei

Vawiin Ni 22.09.2012 (Inrinni) chawhma dar 10:00AM atang hian kan Corps SAY te hmalakna in RM Hall ah Retreat neih a ni a, speaker atan Evan. Lalthanzama Hrahsel, TEM Speaker chu hman a ni a, hun hlimawm tak leh hlawkthlak tak hman a ni. Tlai ah chawhlui kilhona neih a ni bawk. Retreat hi zanin Tawngtai Inkhawm atangin follow-up programme anga chhunzawm tur a ni dawn a, karleh Ni 24.09.2012 (Thawhtanni) zan SAY Inkhawm thleng a awh ang. He follow up programme a tel tur hian Corps chhunga Sipai zawng zawng te sawm kan ni a, tin, he Retreat atanga Thlarau Thianghlim hnathawh kan Corps ah alo thlen ngei theih na turin Sipai tin ten kan tawngtainaah i hre reng ang u.


Corps Cadet Rally

Ni 13-16 September 2012 chhung Darlawn a Corps Cadet Rally neih chu hlawhtling tak leh hlawkthlak takin hman zawh a ni a, kan Corps a Corps Cadet te pawh hlawkna tam tak nen Ni 17.09.2012 (Thawhtanni) chawhnu dar 2:30PM khan dam takin an rawn thleng leh a ni. Kan Corps Cadet te Item neih Pathianin a chawimawi a, request vawi hnih (2) lai dawngin khawmpui tiak zanah phei chuan an lamna ‘Chungkhaw ri’ hla ah inkhawm zawng zawng te an chai mup mup mai a ni.


Hnatlang nei

Ni 19.09.2012 (Nilaini) khan YP Corps hnatlang neih a ni a. He hnatlangah hian YP Corps a naupang, nu leh pa leh zirtirtu eng emaw zat an thawkchhuak a, YP Hall chhung thenfai ngai leh tihfai ngai te an tifai a ni.



As on 15 September, 2012

Corps Cadet Rally

Central North Division Corps Cadet Rally chu tunkar ni 13.09.2012 (Ningani) atang khan tan a ni a, kan Corps a Corps Cadet te pawhin he Rally ah hian Items vawi 2 an nei dawn a, tin, Pathianni Thianghlimna Inkhawmah zai an hruai dawn bawk a ni. Tin, he Rally ah hian kan Corps atangin Pi Mary Vanlalhumi (w/o Pu Robert V.L Thlamuana) chuan Badge of Merit a dawng bawk dawn a ni. He Rally hi hlawk taka hman a nih theih nan leh kan Corps Cadet te pawh dam taka Aizawl an rawn thlen leh theih nan Sipai tin te i tawngtaipui ang u.


Toys khawn dawn

Kan Corps atanga Evangelist Teacher ni a kalchhuak Candidate F.Vanlalringa leh Candidate Lalmalsawmi te nupa awmna hmun Teirei Forest-a Pre-School a naupang khal tur leh in awmtlei na turin kan Corps chhungah Toys hlui leh naupang lawmzawng thil te SAY chuan hun remchang hmasa berah an rawn khawn dawn a, Corps chhunga Sipai chhungkaw zingah pek tur nei kan awm anih chuan lo in ralring turin kan inngen a ni e.


Hnatlang nei

Ni 11.09.2012 (Thawhlehni) zan khan Central North Division Rally, Tuidam a neih tur pandal structure thiarna hnatlang Sikulpuikawnah neih a ni a, Corps hrang hrang 7 (pasarih) atangin an kalkhawm a, kan Corps SAY atang pawhin mi 13 lai an thawkchhuak a, zan dar 1:30AM vel thlengin structure loadna hna hi thawh a ni.



As on 8 September, 2012

Corps Cadet

Kan Corps a Corps Cadet te chuan ni 04.09.2012 (Thawhlehni) khan Hotel Regency, Zarkawt ah ICFAI programme a item neitur a sawm an nih angin Pathian fakna hla hmangin lam an entir a, hun hlawhtling tak an hmang a ni.
Central North Division Corps Cadet Rally chu karleh ni 13.09.2012 (Ningani) atanga tan tur a ni a, kan Corps a Corps Cadet te pawhin he Rally ah hian Items vawi 2 an nei dawn a ni. Tin, he Rally ah hian kan Corps atangin Pi Mary Vanlalhumi (w/o Pu Robert V.L Thlamuana) chuan Badge of Merit a dawng bawk dawn a ni.


Lawmpui

Kan SAY Member Nl. Vanlalmuansangi d/o Pu Vanlalrimawia (Mawitea), Dawrpui South chuan M.Sc (Agri) First Class a a zawh hnu in ni 04.09.2012 (Thawhlehni) khan dam takin Aizawl a rawn thleng. Hetiang ang member kan nei hi Bazar Corps SAY te chuan kan chhuangin, a kal lehzelna turah duhsakna sang ber kan hlan bawk a ni.


Dam takin chhuak

Pu Vanlalzarzokima (Mazara), Dawrpui South chu Durtlang Hospital a hlawhtling taka zai a nih hnu in Ni 05.09.2012 (Nilaini) khan in lama in enkawl turin dam takin a rawn chhuak. Sipai ten hma a sawn zel theih nan i tawngtaipui ang u.


Cassette Release

Vawiin chawhnu dar 2:00PM khan Central North Division Songsters te chuan an Album hmasaber chu R.M Hall ah release na an nei a, hun tha tak an hmang a ni.



As on 1 September, 2012

SAY Bial Meet

Ni 02.09.2012 (Pathianni) nileng leh zan khan Chanmari West Corps ah Bazar C.O Bial SAY Meet chu neih a ni a, hetah hian kan Corps atangin Bazar Corps Band leh SAY Creative Art te items neih a ni a. He meeta Speaker chu Pu Lalthanzama Hrahsel, TEM Spekaer ni.



Beihrual

 Ni 03.09.2012 - 28.09.2012 chhung khan Beihrual Programme neih a ni a, group hnih (2) ah inthenin fehchhuah inkhawmna neih thin a ni.



League Of Mercy te luanchhuahna

Dt. 22.08.2012 (Nilaini) khan Bazar Corps League of Mercy te chuan Pi Ramnghinglovi, Saron Veng chu Rs.1,000/- in an tanpui a. Pi Ramnghinglovi hi Damdawiin ah te a awm a, an chhungkaw dinhmun te an ngaihtuah in LOM te chuan tanpui ngei tha an ti a, tanpuina thilpek hi an pe ta a ni. Pi Ramnghinglovi hi hmeithai niin a fanu nen harsa takin an khawsa ve a ni.

No comments:

Post a Comment