Phunchawng leh Rangvamual a Isua avanga zu zawrh bansante tanpuina pek ani

Salvation Army Youth te chuan Action Plan 2009 a a lo duanlawk tawh angin Phunchawng leh Rangvamual a Isua avanga an eizawnna (zu zawrh) bansan ta te a tanpui.

Bazar Corps Salvation Army Youth te chuan Action Plan , 2009 a kan neih angin Phunchawng leh Rangvamual a Isua avanga an eizawnna -zu zawrh bansan ta te tanpui nan R.M Hall kawt ah Bawm ( Thawmhnaw, Buhfai leh pawisa dahna tur Bawm) hun nise kan ti a, hei hi Social & Community Incharge te hmalakna ani a, chumi bawhzui chuan February thla chhung khan Biakin kawt ah Bawm hun a ni a, chutah chuan Pawisa Rs. 4200.00 leh thawmhnaw Cement Bag 7 vel a tla a. Heng thilpek chi hrang hrang te hi March ni 3, 2009 zan khan SAY hruaitu ten Phunchawng leh Rangvamual ah an hlan a .

Thilpek an pek te chu :-

1) Pi Runi kum 70 bawr vel (ani hian fa hmeichhia pahnih a nei a, pakhat mitdel leh pakhat zawk chu tawngtheilo an ni) Phunchawng a cheng an ni a, awmna tur In an neilova, Phunchawng a Sipai Pawl ten Biakin bul ah in an luah tir a, an ni hnen ah hian pawisa Rs.1000.00 (Sangkhat ) leh thuamhnaw bag 1 pek a ni a, an tan tawngtaina neih a ni bawk.

2) Pu Laldawnga Rangvamual, anni hian tun ah hian eizawnna tur bultanna pawh an nei lova, an zu zawrh an bansan tawh si a, mi inhnuai chep tak ah an fate nen an khawsa mek a, anni hnen ah hian pawisa Rs.1000.00 (Sangkhat ) leh thuamhnaw bag1 pek a ni a, an tan tawngtai a ni bawk.

3) Pu Lalzarliana, Rangvamual, nikum 2008 atang tawh khan an zuzawrh hi an lo bansan tawh a, eizawngtu ber Pu Lalzarliana hi damlohna in a tlakbuak avangin hna a thawk tha thei lo a, tun ah hian Isua avangin khawsak harsa takin an awm a, mahse hlim takin an khawsa thei a . Tanpuina Rs.1000 (Sangkhat ) leh thuamhnaw bag 1 pek a ni a, an tan hian tawngtaina hun hman a ni bawk.

Thilpek chi hrang hrang petu zawng zawng chungah SAY te chu an lawm takzet a, petu te a let tam takin Pathianin malsawm rawh se. Midangte tana malsawmna ni tura thilpek hi uar deuh deuh theih a tha hle a ni. Lalpa chu fakin awm rawh se.